ಚಾ ಪರ್ಕ ಕಲಾವಿದರು ಮಂಗಳೂರಿನ ಅತ್ಯಂತ ಜನಪ್ರಿಯ ತುಳು ಹಾಸ್ಯ ನಾಟಕ ತಂಡಗಳಲ್ಲಿ ಒಂದಾಗಿದೆ. ನಟನೆ, ನಿರ್ದೇಶನ, ರಚನೆ, ಗೀತಸಾಹಿತ್ಯ ಹಾಗೂ ಗಾಯನ ಕ್ಷೇತ್ರಗಳಲ್ಲಿ ಛಾಪು ಮೂಡಿಸಿ "ತೆಲಿಕೆದ ಬೊಳ್ಳಿ" ಎಂದೇ ಖ್ಯಾತರಾದ ಡಾ. ದೇವದಾಸ್ ಕಾಪಿಕಾಡ್ ಅವರು ಈ ತಂಡವನ್ನು ಕಟ್ಟಿ ಮುನ್ನಡೆಸುತ್ತಿದ್ದಾರೆ. ರಂಗಭೂಮಿಗೆ ಸಲ್ಲಿಸಿದ ದಶಕಗಳ ಸೇವೆಯನ್ನು ಗುರುತಿಸಿ ಮಂಗಳೂರು ವಿಶ್ವವಿದ್ಯಾಲಯವು 2022ರಲ್ಲಿ ಇವರಿಗೆ ಗೌರವ ಡಾಕ್ಟರೇಟ್ ನೀಡಿ ಗೌರವಿಸಿದೆ. ಕಾಪಿಕಾಡ್ ಅವರೊಂದಿಗೆ, ಭೋಜರಾಜ ವಾಮಂಜೂರು ಹಾಗೂ ನವೀನ್ ಡಿ. ಪಡೀಲ್ ಅವರನ್ನೊಳಗೊಂಡ ಹಾಸ್ಯ ದಿಗ್ಗಜರ ಸಮಾಗಮ ಈ ತಂಡದ ವಿಶೇಷತೆ. ಈ ತಂಡದ ಎಲ್ಲಾ ನಾಟಕಗಳು ತುಳು ರಂಗಭೂಮಿಯಲ್ಲಿ ಹೊಸ ಕ್ರಾಂತಿಯನ್ನೇ ಸೃಷ್ಟಿಸಿ, ಹಲವು ಹೊಸ ನಾಟಕ ತಂಡಗಳ ಉದಯಕ್ಕೆ ಪ್ರೇರಣೆಯಾಗಿದೆ. ಕರಾವಳಿಯಷ್ಟೇ ಅಲ್ಲದೆ ದುಬೈ, ಮಸ್ಕತ್ ಸೇರಿದಂತೆ ಯುಎಇಯ ವಿವಿಧೆಡೆ ಈ ತಂಡ ಯಶಸ್ವಿ ಪ್ರದರ್ಶನಗಳನ್ನು ನೀಡಿದೆ. ಕೇವಲ ಹಾಸ್ಯವಷ್ಟೇ ಅಲ್ಲದೆ ಸಾಮಾಜಿಕ ಸಂದೇಶಗಳನ್ನು ಹಾಸ್ಯದ ಮೂಲಕ ಜನರಿಗೆ ತಲುಪಿಸಿದ 'ಚಾ ಪರ್ಕ' ತಂಡವು ತುಳು ರಂಗಭೂಮಿಗೆ ಒಟ್ಟು 61 ನಾಟಕಗಳನ್ನು ಕೊಡುಗೆಯಾಗಿ ನೀಡಿದೆ. ವಿಶೇಷವೆಂದರೆ, ಈ ಎಲ್ಲಾ 61 ನಾಟಕಗಳನ್ನೂ ಸ್ವತಃ ದೇವದಾಸ್ ಕಾಪಿಕಾಡ್ ಅವರೇ ರಚಿಸಿ, ಎಲ್ಲದರಲ್ಲೂ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುವ ಮೂಲಕ ತುಳು ನಾಟಕ ಲೋಕದಲ್ಲಿ ತಾವೂ ಮತ್ತು ತಮ್ಮ ತಂಡವೂ ಜನ ಮಾನಸದಲ್ಲಿ ಅಚ್ಚಳಿಯದೆ ಉಳಿಯುವಂತೆ ಮಾಡಿದ್ದಾರೆ.